ភ្នំពេញ: ក្រុមប្រឹក្សាជាតិប្រាក់ឈ្មួលអប្បបរមា បើកកិច្ចប្រជុំលើកទី១ ដើម្បីពិភាក្សាកំណត់ប្រាក់ឈ្នួលទាបបំផុតដល់កម្មករនិយោជិតផ្នែកវាយនភណ្ឌកាត់ដេរ និងផលិតស្បែកជើង សម្រាប់ឆ្នាំ២០២២។

ក្នុងសេចក្ដីថ្លែងការណ៍ចុះថ្ងៃទី៧ កញ្ញា ឆ្នាំ២០២១ ក្រុមប្រឹក្សាជាតិប្រាក់ឈ្នួលអប្បបរមា ឱ្យដឹងថា នៅព្រឹកនេះ ក្រុមប្រឹក្សាជាតិបានពិភាក្សាប្រមូលមូលដ្ឋាននានាដើម្បីកំណត់ប្រាក់ឈ្មួលសម្រាប់កម្មករក្នុងវិស័យកាត់ដេរក្នុងឆ្នាំ២០២២ហើយ ខណៈនឹងមានកិច្ចប្រជុំបន្តទៀតនៅថ្ងៃទី ១៤ ទ២១ និងទី២៨ ខាងមុខបន្តទៀត។

កិច្ចប្រជុំក្រុមប្រឹក្សាជាតិប្រាក់ឈ្នួលអប្បបរមា គឺជាកិច្ចប្រជុំដែលមានត្រីភាគីចូលរួមដែលរួមមានតំណាងរដ្ឋាភិបាល តំណាងនិយោជក និងតំណាងសហជីព ដើម្បីពិភាក្សារកសេចក្ដីសម្រេចរួមមួយ កំណត់ប្រាក់ឈ្នួលទាបបំផុតសម្រាប់កម្មករនៅឆ្នាំនីមួយៗ។

ក្នុងករណីដែលនិយោជិក និងសហជីពរកមិនឃើញសេចក្តីសម្រេចរួមគ្នាទេពួកគេត្រូវបានស្នើអោយបោះឆ្នោតគាំទ្រសំណើរបស់រដ្ឋាភិបាលស្តីពីប្រាក់ឈ្នួលអប្បបរមា។

ក្នុងឆ្នាំ២០២១ ប្រាក់ឈ្នួលទាបបំផុតរបស់កម្មករយោជិត ផ្នែកវាយនភណ្ឌ កាត់ដេរ និងផលិតស្បែកជើងទទួលបាន ១៩២ដុល្លារក្នុង១ខែ៕